[631] Katamantaṃ rūpaṃ ajjhattikaṃ rūpassa najaratā cakkhāyatanaṃ .pe. kāyāyatanaṃ idantaṃ rūpaṃ rūpassa najaratā . katamantaṃ rūpaṃ bāhiraṃ rūpassa jaratā yā rūpassa jarā jīraṇatā khaṇḍiccaṃ pāliccaṃ valittacatā āyuno saṃhāni indriyānaṃ paripāko idantaṃ rūpaṃ bāhiraṃ rūpassa jaratā . katamantaṃ rūpaṃ bāhiraṃ rūpassa najaratā rūpāyatanaṃ .pe. kabaḷiṃkāro āhāro idantaṃ rūpaṃ bāhiraṃ rūpassa najaratā.

[632] Katamantaṃ rūpaṃ ajjhattikaṃ rūpassa naaniccatā cakkhāyatanaṃ .pe. kāyāyatanaṃ idantaṃ rūpaṃ ajjhattikaṃ rūpassa naaniccatā . Katamantaṃ rūpaṃ bāhiraṃ rūpassa aniccatā yo rūpassa khayo vayo bhedo paribhedo aniccatā antaradhānaṃ idantaṃ rūpaṃ bāhiraṃ rūpassa aniccatā . katamantaṃ rūpaṃ bāhiraṃ rūpassa naaniccatā rūpāyatanaṃ .pe. kabaḷiṃkāro āhāro idantaṃ rūpaṃ bāhiraṃ rūpassa naaniccatā.

[633] Katamantaṃ rūpaṃ ajjhattikaṃ na kabaḷiṃkāro āhāro cakkhāyatanaṃ .pe. kāyāyatanaṃ idantaṃ rūpaṃ ajjhattikaṃ na kabaḷiṃkāro āhāro . Katamantaṃ rūpaṃ bāhiraṃ kabaḷiṃkāro āhāro odano kummāso sattu maccho maṃsaṃ khīraṃ dadhi sappi navanītaṃ telaṃ madhu phāṇitaṃ yaṃ vā panaññampi atthi rūpaṃ yamhi yamhi janapade tesaṃ tesaṃ sattānaṃ mukhāsiyaṃ dantavikhādanaṃ galajjhoharaṇīyaṃ kucchivitthambhanaṃ yāya ojāya sattā yāpenti idantaṃ rūpaṃ bāhiraṃ kabaḷiṃkāro āhāro . Katamantaṃ rūpaṃ bāhiraṃ na kabaḷiṃkāro āhāro rūpāyatanaṃ .pe. rūpassa aniccatā idantaṃ rūpaṃ bāhiraṃ na kabaḷiṃkāro āhāro. Evaṃ tividhena rūpasaṅgaho. Tikaniddeso.