[641] Katamantaṃ rūpaṃ upādinnaṃ mahābhūtaṃ kammassa katattā phoṭṭhabbāyatanaṃ āpodhātu idantaṃ rūpaṃ upādinnaṃ mahābhūtaṃ . Katamantaṃ rūpaṃ upādinnaṃ namahābhūtaṃ cakkhāyatanaṃ .pe. kāyāyatanaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ ākāsadhātu rūpassa upacayo rūpassa santati kabaḷiṃkāro āhāro idantaṃ rūpaṃ upādinnaṃ namahābhūtaṃ. {641.1} Katamantaṃ rūpaṃ anupādinnaṃ mahābhūtaṃ na kammassa katattā phoṭṭhabbāyatanaṃ āpodhātu idantaṃ rūpaṃ anupādinnaṃ mahābhūtaṃ. {641.2} Katamantaṃ rūpaṃ anupādinnaṃ namahābhūtaṃ saddāyatanaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ ākāsadhātu rūpassa upacayo rūpassa santati kabaḷiṃkāro āhāro idantaṃ rūpaṃ anupādinnaṃ namahābhūtaṃ.

[642] Katamantaṃ rūpaṃ upādinnaṃ oḷārikaṃ cakkhāyatanaṃ .pe. Kāyāyatanaṃ yaṃ vā panaññampi atthi rūpaṃ kammassa katattā Rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ upādinnaṃ oḷārikaṃ . katamantaṃ rūpaṃ upādinnaṃ sukhumaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ upādinnaṃ sukhumaṃ. {642.1} Katamantaṃ rūpaṃ anupādinnaṃ oḷārikaṃ saddāyatanaṃ yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ anupādinnaṃ oḷārikaṃ. {642.2} Katamantaṃ rūpaṃ anupādinnaṃ sukhumaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ anupādinnaṃ sukhumaṃ.