[643] Katamantaṃ rūpaṃ upādinnaṃ dūre itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ upādinnaṃ dūre . katamantaṃ rūpaṃ upādinnaṃ santike cakkhāyatanaṃ .pe. kāyāyatanaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ upādinnaṃ santike . katamantaṃ rūpaṃ anupādinnaṃ dūre Kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ anupādinnaṃ dūre . katamantaṃ rūpaṃ anupādinnaṃ santike saddāyatanaṃ yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ anupādinnaṃ santike.

[644] Katamantaṃ rūpaṃ upādinnupādāniyaṃ sanidassanaṃ kammassa katattā rūpāyatanaṃ idantaṃ rūpaṃ upādinnupādāniyaṃ sanidassanaṃ . Katamantaṃ rūpaṃ upādinnupādāniyaṃ anidassanaṃ cakkhāyatanaṃ .pe. Kāyāyatanaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ upādinnupādāniyaṃ anidassanaṃ. {644.1} Katamantaṃ rūpaṃ anupādinnupādāniyaṃ sanidassanaṃ na kammassa katattā rūpāyatanaṃ idantaṃ rūpaṃ anupādinnupādāniyaṃ sanidassanaṃ. {644.2} Katamantaṃ rūpaṃ anupādinnupādāniyaṃ anidassanaṃ saddāyatanaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu Rūpassa upacayo rūpassa santati kabaḷiṃkāro āhāro idantaṃ rūpaṃ anupādinnupādāniyaṃ anidassanaṃ.