[647] Katamantaṃ rūpaṃ upādinnupādāniyaṃ oḷārikaṃ cakkhāyatanaṃ .pe. kāyāyatanaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ upādinnupādāniyaṃ oḷārikaṃ . katamantaṃ rūpaṃ upādinnupādāniyaṃ sukhumaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ Upādinnupādāniyaṃ sukhumaṃ . katamantaṃ rūpaṃ anupādinnupādāniyaṃ oḷārikaṃ saddāyatanaṃ yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ anupādinnupādāniyaṃ oḷārikaṃ . katamantaṃ rūpaṃ anupādinnupādāniyaṃ sukhumaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ anupādinnupādāniyaṃ sukhumaṃ.

[648] Katamantaṃ rūpaṃ upādinnupādāniyaṃ dūre itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ upādinnupādāniyaṃ dūre . Katamantaṃ rūpaṃ upādinnupādāniyaṃ santike cakkhāyatanaṃ .pe. kāyāyatanaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ upādinnupādāniyaṃ santike . katamantaṃ rūpaṃ anupādinnupādāniyaṃ dūre kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā ākāsadhātu āpodhātu rūpassa upacayo rūpassa Santati kabaḷiṃkāro āhāro idantaṃ rūpaṃ anupādinnupādāniyaṃ dūre . katamantaṃ rūpaṃ anupādinnupādāniyaṃ santike saddāyatanaṃ yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ idantaṃ rūpaṃ anupādinnupādāniyaṃ santike.