[653] Katamantaṃ rūpaṃ mahābhūtaṃ oḷārikaṃ phoṭṭhabbāyatanaṃ idantaṃ rūpaṃ mahābhūtaṃ oḷārikaṃ . katamantaṃ rūpaṃ mahābhūtaṃ sukhumaṃ āpodhātu idantaṃ rūpaṃ mahābhūtaṃ sukhumaṃ . katamantaṃ rūpaṃ namahābhūtaṃ oḷārikaṃ cakkhāyatanaṃ .pe. rasāyatanaṃ idantaṃ rūpaṃ namahābhūtaṃ oḷārikaṃ . katamantaṃ rūpaṃ namahābhūtaṃ sukhumaṃ itthindriyaṃ .pe. Kabaḷiṃkāro āhāro idantaṃ rūpaṃ namahābhūtaṃ sukhumaṃ.

[654] Katamantaṃ rūpaṃ mahābhūtaṃ dūre āpodhātu idantaṃ rūpaṃ mahābhūtaṃ dūre . katamantaṃ rūpaṃ mahābhūtaṃ santike phoṭṭhabbāyatanaṃ idantaṃ rūpaṃ mahābhūtaṃ santike . katamantaṃ rūpaṃ namahābhūtaṃ dūre Itthindriyaṃ .pe. kabaḷiṃkāro āhāro idantaṃ rūpaṃ namahābhūtaṃ dūre . katamantaṃ rūpaṃ namahābhūtaṃ santike cakkhāyatanaṃ .pe. Rasāyatanaṃ idantaṃ rūpaṃ namahābhūtaṃ santike.

[655] Rūpāyatanaṃ diṭṭhaṃ saddāyatanaṃ sutaṃ gandhāyatanaṃ rasāyatanaṃ phoṭṭhabbāyatanaṃ mutaṃ sabbaṃ rūpaṃ manasā viññātaṃ rūpaṃ. Evaṃ catubbidhena rūpasaṅgaho. Catukkaṃ.

[656] Katamantaṃ rūpaṃ paṭhavīdhātu yaṃ kakkhaḷaṃ kharagataṃ kakkhaḷattaṃ kakkhaḷabhāvo ajjhattaṃ vā bahiddhā vā upādinnaṃ vā anupādinnaṃ vā idantaṃ rūpaṃ paṭhavīdhātu . katamantaṃ rūpaṃ āpodhātu yaṃ āpo āpogataṃ sineho sinehagataṃ bandhanattaṃ rūpassa ajjhattaṃ vā bahiddhā vā upādinnaṃ vā anupādinnaṃ vā idantaṃ rūpaṃ āpodhātu . Katamantaṃ rūpaṃ tejodhātu yaṃ tejo tejogataṃ usmā usmāgataṃ usumaṃ usumagataṃ ajjhattaṃ vā bahiddhā vā upādinnaṃ vā anupādinnaṃ vā idantaṃ rūpaṃ tejodhātu . katamantaṃ rūpaṃ vāyodhātu yaṃ vāyo vāyogataṃ thambhitattaṃ rūpassa ajjhattaṃ vā bahiddhā vā upādinnaṃ vā anupādinnaṃ vā idantaṃ rūpaṃ vāyodhātu . katamantaṃ rūpaṃ upādā cakkhāyatanaṃ .pe. kabaḷiṃkāro āhāro idantaṃ rūpaṃ upādā. Evaṃ pañcavidhena rūpasaṅgaho. Pañcakaṃ.