[661] Katamantaṃ rūpaṃ cakkhundriyaṃ yaṃ cakkhuṃ catunnaṃ mahābhūtānaṃ upādāya pasādo .pe. suñño gāmopeso idantaṃ rūpaṃ cakkhundriyaṃ . katamantaṃ rūpaṃ sotindriyaṃ .pe. ghānindriyaṃ .pe. Jivhindriyaṃ .pe. kāyindriyaṃ .pe. itthindriyaṃ .pe. purisindriyaṃ .pe. jīvitindriyaṃ yo tesaṃ rūpīnaṃ dhammānaṃ āyu ṭhiti yapanā yāpanā iriyanā vattanā pālanā jīvitaṃ jīvitindriyaṃ idantaṃ rūpaṃ jīvitindriyaṃ . katamantaṃ rūpaṃ na indriyaṃ sappaṭighaṃ rūpāyatanaṃ .pe. Phoṭṭhabbāyatanaṃ idantaṃ rūpaṃ na indriyaṃ sappaṭighaṃ . katamantaṃ rūpaṃ na indriyaṃ appaṭighaṃ kāyaviññatti .pe. kabaḷiṃkāro āhāro idantaṃ rūpaṃ na indriyaṃ appaṭighaṃ. Evaṃ dasavidhena rūpasaṅgaho. Dasakaṃ.

[662] Katamantaṃ rūpaṃ cakkhāyatanaṃ yaṃ cakkhuṃ catunnaṃ mahābhūtānaṃ upādāya pasādo .pe. suñño gāmopeso idantaṃ rūpaṃ Cakkhāyatanaṃ . katamantaṃ rūpaṃ sotāyatanaṃ .pe. ghānāyatanaṃ .pe. Jivhāyatanaṃ .pe. kāyāyatanaṃ .pe. rūpāyatanaṃ .pe. saddāyatanaṃ .pe. gandhāyatanaṃ .pe. rasāyatanaṃ .pe. phoṭṭhabbāyatanaṃ paṭhavīdhātu .pe. phoṭṭhabbadhātupesā idantaṃ rūpaṃ phoṭṭhabbāyatanaṃ . Katamantaṃ rūpaṃ anidassanaṃ appaṭighaṃ dhammāyatanapariyāpannaṃ itthindriyaṃ .pe. kabaḷiṃkāro āhāro idantaṃ rūpaṃ anidassanaṃ appaṭighaṃ dhammāyatanapariyāpannaṃ. Evaṃ ekādasavidhena rūpasaṅgaho. Ekādasakaṃ. Rūpavibhatti. Aṭṭhamaṃ bhāṇavāraṃ . --------