[739] Tattha katamo sīlabbataparāmāso kāyagantho ito bahiddhā samaṇabrāhmaṇānaṃ sīlena suddhi vatena suddhi sīlabbatena suddhīti yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaññojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyesaggāho ayaṃ vuccati sīlabbataparāmāso kāyagantho.

[740] Tattha katamo idaṃsaccābhiniveso kāyagantho sassato loko idameva saccaṃ moghamaññanti vā asassato loko idameva saccaṃ moghamaññanti vā antavā loko idameva saccaṃ moghamaññanti vā anantavā loko idameva saccaṃ moghamaññanti vā taṃ jīvaṃ taṃ sarīraṃ idameva saccaṃ moghamaññanti vā aññaṃ jīvaṃ aññaṃ sarīraṃ idameva saccaṃ moghamaññanti vā hoti tathāgato parammaraṇā idameva saccaṃ moghamaññanti vā na hoti tathāgato parammaraṇā idameva saccaṃ moghamaññanti vā hoti ca Na ca hoti tathāgato parammaraṇā idameva saccaṃ moghamaññanti vā neva hoti na na hoti tathāgato parammaraṇā idameva saccaṃ moghamaññanti vā yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaññojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyesaggāho ayaṃ vuccati idaṃsaccābhiniveso kāyagantho . ṭhapetvā sīlabbataparāmāsaṃ kāyaganthaṃ sabbāpi micchādiṭṭhi idaṃsaccābhiniveso kāyagantho. Ime dhammā ganthā.

[741] Katame dhammā noganthā te dhammā ṭhapetvā avasesā kusalākusalābyākatā dhammā kāmāvacarā rūpāvacarā arūpāvacarā apariyāpannā vedanākkhandho .pe. viññāṇakkhandho sabbañca rūpaṃ asaṅkhatā ca dhātu ime dhammā noganthā.

[742] Katame dhammā ganthaniyā sāsavā kusalākusalābyākatā dhammā kāmāvacarā rūpāvacarā arūpāvacarā rūpakkhandho .pe. Viññāṇakkhandho ime dhammā ganthaniyā . katame dhammā aganthaniyā apariyāpannā maggā ca maggaphalāni ca asaṅkhatā ca dhātu ime dhammā aganthaniyā.