[868] Tattha katamaṃ samathanimittaṃ yā cittassa ṭhiti .pe. Sammāsamādhi idaṃ vuccati samathanimittaṃ . tattha katamaṃ paggāhanimittaṃ yo cetasiko viriyārambho .pe. sammāvāyāmo idaṃ vuccati paggāhanimittaṃ.

[869] Tattha katamo paggāho yo cetasiko viriyārambho .pe. sammāvāyāmo ayaṃ vuccati paggāho . tattha katamo avikkhepo yā cittassa ṭhiti .pe. sammāsamādhi ayaṃ vuccati avikkhepo.

[870] Tattha katamā sīlavipatti yo kāyiko vītikkamo vācasiko Vītikkamo kāyikavācasiko vītikkamo ayaṃ vuccati sīlavipatti sabbampi dussīlyaṃ sīlavipatti . tattha katamā diṭṭhivipatti natthi dinnaṃ natthi yiṭṭhaṃ natthi hutaṃ natthi sukaṭadukkaṭānaṃ kammānaṃ phalavipāko natthi ayaṃ loko natthi paro loko natthi mātā natthi pitā natthi sattā opapātikā natthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentīti yā evarūpā diṭṭhi diṭṭhigataṃ .pe. vipariyesaggāho ayaṃ vuccati diṭṭhivipatti sabbāpi micchādiṭṭhi diṭṭhivipatti.

[871] Tattha katamā sīlasampadā kāyiko avītikkamo vācasiko avītikkamo kāyikavācasiko avītikkamo ayaṃ vuccati sīlasampadā sabbopi sīlasaṃvaro sīlasampadā . tattha katamā diṭṭhisampadā atthi dinnaṃ atthi yiṭṭhaṃ atthi hutaṃ atthi sukaṭadukkaṭānaṃ kammānaṃ phalavipāko atthi ayaṃ loko atthi paro loko atthi mātā atthi pitā atthi sattā opapātikā atthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentīti yā evarūpā paññā pajānanā .pe. amoho dhammavicayo sammādiṭṭhi ayaṃ vuccati diṭṭhisampadā sabbāpi sammādiṭṭhi diṭṭhisampadā.