[64] Katamā tasmiṃ samaye cittapāguññatā hoti yā tasmiṃ samaye viññāṇakkhandhassa paguṇatā paguṇattaṃ paguṇabhāvo ayaṃ tasmiṃ samaye cittapāguññatā hoti.

[65] Katamā tasmiṃ samaye kāyujukatā hoti yā tasmiṃ samaye vedanākkhandhassa saññākkhandhassa saṅkhārakkhandhassa ujutā ujukatā ajimhatā avaṅkatā akuṭilatā ayaṃ tasmiṃ samaye kāyujukatā hoti.

[66] Katamā tasmiṃ samaye cittujukatā hoti yā tasmiṃ samaye viññāṇakkhandhassa ujutā ujukatā ajimhatā avaṅkatā akuṭilatā ayaṃ tasmiṃ samaye cittujukatā hoti.

[67] Katamā tasmiṃ samaye sati hoti yā tasmiṃ samaye sati anussati paṭissati sati saraṇatā dhāraṇatā apilāpanatā asammusanatā sati satindriyaṃ satibalaṃ sammāsati ayaṃ tasmiṃ samaye sati hoti.