[885] Katame dhammā dassanenapahātabbā cattāro diṭṭhigatasampayuttā cittuppādā vicikicchāsahagato cittuppādo ime dhammā dassanenapahātabbā . katame dhammā bhāvanāyapahātabbā uddhaccasahagato cittuppādo ime dhammā bhāvanāyapahātabbā . Cattāro diṭṭhigatavippayuttalobhasahagatā cittuppādā dve domanassasahagatā cittuppādā ime dhammā siyā dassanenapahātabbā siyā bhāvanāyapahātabbā . katame dhammā nevadassanena- nabhāvanāyapahātabbā catūsu bhūmīsu kusalaṃ catūsu bhūmīsu vipāko tīsu bhūmīsu kiriyābyākataṃ rūpañca nibbānañca ime dhammā nevadassanenanabhāvanāyapahātabbā.

[886] Katame dhammā dassanenapahātabbahetukā cattāro diṭṭhigatasampayuttā cittuppādā vicikicchāsahagato cittuppādo etthuppannaṃ mohaṃ ṭhapetvā ime dhammā dassanenapahātabbahetukā . Katame dhammā bhāvanāyapahātabbahetukā uddhaccasahagato cittuppādo etthuppannaṃ mohaṃ ṭhapetvā ime dhammā bhāvanāyapahātabbahetukā . Cattāro diṭṭhigatavippayuttalobhasahagatā cittuppādā dve domanassasahagatā cittuppādā ime dhammā siyā dassanenapahātabbahetukā siyā bhāvanāyapahātabbahetukā . katame dhammā Nevadassanenanabhāvanāyapahātabbahetukā vicikicchāsahagato moho uddhaccasahagato moho catūsu bhūmīsu kusalaṃ catūsu bhūmīsu vipāko tīsu bhūmīsu kiriyābyākataṃ rūpañca nibbānañca ime dhammā nevadassanena- nabhāvanāyapahātabbahetukā.

[887] Katame dhammā ācayagāmino tīsu bhūmīsu kusalaṃ akusalaṃ ime dhammā ācayagāmino . katame dhammā apacayagāmino cattāro maggā apariyāpannā ime dhammā apacayagāmino . katame dhammā nevācayagāminonāpacayagāmino catūsu bhūmīsu vipāko tīsu bhūmīsu kiriyābyākataṃ rūpañca nibbānañca ime dhammā nevācayagāminonāpacayagāmino.

[888] Katame dhammā sekkhā cattāro maggā apariyāpannā heṭṭhimāni ca tīṇi sāmaññaphalāni ime dhammā sekkhā . katame dhammā asekkhā uparimaṃ arahattaphalaṃ ime dhammā asekkhā . Katame dhammā nevasekkhānāsekkhā tīsu bhūmīsu kusalaṃ akusalaṃ tīsu bhūmīsu vipāko tīsu bhūmīsu kiriyābyākataṃ rūpañca nibbānañca ime dhammā nevasekkhānāsekkhā.