[889] Katame dhammā parittā kāmāvacarakusalaṃ akusalaṃ sabbo kāmāvacarassa vipāko kāmāvacarakiriyābyākataṃ sabbañca rūpaṃ ime dhammā parittā . katame dhammā mahaggatā rūpāvacarā arūpāvacarā kusalābyākatā ime dhammā mahaggatā . katame dhammā appamāṇā Cattāro maggā apariyāpannā cattāri ca sāmaññaphalāni nibbānañca ime dhammā appamāṇā.

[890] Katame dhammā parittārammaṇā sabbo kāmāvacarassa vipāko kiriyā manodhātu kiriyāhetukā manoviññāṇadhātu somanassasahagatā ime dhammā parittārammaṇā . katame dhammā mahaggatārammaṇā viññānañcāyatanaṃ nevasaññānāsaññāyatanaṃ ime dhammā mahaggatārammaṇā . katame dhammā appamāṇārammaṇā cattāro maggā apariyāpannā cattāri ca sāmaññaphalāni ime dhammā appamāṇārammaṇā . kāmāvacarakusalato cattāro ñāṇavippayuttā cittuppādā kiriyato cattāro ñāṇavippayuttā cittuppādā sabbaṃ akusalaṃ ime dhammā siyā parittārammaṇā siyā mahaggatārammaṇā na appamāṇārammaṇā siyā na vattabbā parittārammaṇātipi mahaggatārammaṇātipi. {890.1} Kāmāvacarakusalato cattāro ñāṇasampayuttā cittuppādā kiriyato cattāro ñāṇasampayuttā cittuppādā rūpāvacaraṃ catutthaṃ jhānaṃ kusalato ca kiriyato ca kiriyāhetukā manoviññāṇadhātu upekkhāsahagatā ime dhammā siyā parittārammaṇā siyā mahaggatārammaṇā siyā appamāṇārammaṇā siyā na vattabbā parittārammaṇātipi mahaggatārammaṇātipi appamāṇārammaṇātipi . rūpāvacaratikacatukkajjhānā kusalato ca vipākato ca kiriyato ca catutthassa jhānassa vipāko ākāsānañcāyatanaṃ Ākiñcaññāyatanaṃ ime dhammā na vattabbā parittārammaṇātipi mahaggatārammaṇātipi appamāṇārammaṇātipi . rūpañca nibbānañca anārammaṇā.

[891] Katame dhammā hīnā dvādasa akusalacittuppādā ime dhammā hīnā . katame dhammā majjhimā tīsu bhūmīsu kusalaṃ tīsu bhūmīsu vipāko tīsu bhūmīsu kiriyābyākataṃ sabbañca rūpaṃ ime dhammā majjhimā . katame dhammā paṇītā cattāro maggā apariyāpannā cattāri ca sāmaññaphalāni nibbānañca ime dhammā paṇītā.