[954] Katame dhammā upādā cakkhāyatanaṃ .pe. kabaḷiṃkāro āhāro ime dhammā upādā . katame dhammā noupādā catūsu bhūmīsu kusalaṃ akusalaṃ catūsu bhūmīsu vipāko tīsu bhūmīsu kiriyābyākataṃ cattāro ca mahābhūtā nibbānañca ime dhammā noupādā.

[955] Katame dhammā upādinnā tīsu bhūmīsu vipāko yañca rūpaṃ kammassa katattā ime dhammā upādinnā . katame dhammā anupādinnā tīsu bhūmīsu kusalaṃ akusalaṃ tīsu bhūmīsu kiriyābyākataṃ yañca rūpaṃ na kammassa katattā cattāro maggā apariyāpannā cattāri ca sāmaññaphalāni nibbānañca ime dhammā anupādinnā. ------------