[991] Tattha katamāni cha vivādamūlāni kodho makkho issā sātheyyaṃ pāpicchatā sandiṭṭhiparāmāsitā imāni cha vivādamūlāni.

[992] Tattha katame cha chandarāgā gehasitā dhammā manāpikesu rūpesu gehasito rāgo sārāgo .pe. cittassa sārāgo manāpikesu saddesu .pe. manāpikesu gandhesu .pe. manāpikesu rasesu .pe. manāpikesu phoṭṭhabbesu .pe. manāpikesu dhammesu gehasito Rāgo sārāgo .pe. cittassa sārāgo ime cha chandarāgā gehasitā dhammā.

[993] Tattha katamāni cha virodhavatthūni amanāpikesu rūpesu cittassa āghāto paṭighāto .pe. caṇḍikkaṃ assuropo anattamanatā cittassa amanāpikesu saddesu .pe. amanāpikesu gandhesu .pe. Amanāpikesu rasesu .pe. amanāpikesu phoṭṭhabbesu .pe. Amanāpikesu dhammesu cittassa āghāto paṭighāto .pe. caṇḍikkaṃ assuropo anattamanatā cittassa imāni cha virodhavatthūni.

[994] Tattha katame cha taṇhākāyā rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā ime cha taṇhākāyā.