[32] Pañcakkhandhā rūpakkhandho vedanākkhandho saññākkhandho saṅkhārakkhandho viññāṇakkhandho. Tattha katamo rūpakkhandho

[33] Ekavidhena rūpakkhandho sabbaṃ rūpaṃ na hetu ahetukaṃ hetuvippayuttaṃ sappaccayaṃ saṅkhataṃ rūpaṃ lokiyaṃ sāsavaṃ saññojaniyaṃ ganthaniyaṃ oghaniyaṃ yoganiyaṃ nīvaraṇiyaṃ parāmaṭṭhaṃ upādāniyaṃ saṅkilesikaṃ abyākataṃ anārammaṇaṃ acetasikaṃ cittavippayuttaṃ nevavipāka navipākadhammadhammaṃ asaṅkiliṭṭhasaṅkilesikaṃ nasavitakkasavicāraṃ naavitakkavicāramattaṃ avitakkaavicāraṃ napītisahagataṃ nasukhasahagataṃ naupekkhāsahagataṃ nevadassanenanabhāvanāyapahātabbaṃ nevadassanenanabhāvanāyapahātabbahetukaṃ nevācayagāmināpacayagāmi nevasekkhanāsekkhaṃ parittaṃ kāmāvacaraṃ narūpāvacaraṃ naarūpāvacaraṃ pariyāpannaṃ noapariyāpannaṃ aniyataṃ aniyyānikaṃ uppannaṃ chahi Viññāṇehi viññeyyaṃ aniccaṃ jarābhibhūtaṃ evaṃ ekavidhena rūpakkhandho.

[34] Duvidhena rūpakkhandho atthi rūpaṃ upādā atthi rūpaṃ no upādā . atthi rūpaṃ upādinnaṃ atthi rūpaṃ anupādinnaṃ . Atthi rūpaṃ upādinnupādāniyaṃ atthi rūpaṃ anupādinnupādāniyaṃ . Atthi rūpaṃ sanidassanaṃ atthi rūpaṃ anidassanaṃ . atthi rūpaṃ sappaṭighaṃ atthi rūpaṃ appaṭighaṃ . atthi rūpaṃ indriyaṃ atthi rūpaṃ na indriyaṃ. Atthi rūpaṃ mahābhūtaṃ atthi rūpaṃ na mahābhūtaṃ . atthi rūpaṃ viññatti atthi rūpaṃ na viññatti . atthi rūpaṃ cittasamuṭṭhānaṃ atthi rūpaṃ na cittasamuṭṭhānaṃ . atthi rūpaṃ cittasahabhū atthi rūpaṃ na cittasahabhū . Atthi rūpaṃ cittānuparivatti atthi rūpaṃ na cittānuparivatti . atthi rūpaṃ ajjhattikaṃ atthi rūpaṃ bāhiraṃ . atthi rūpaṃ oḷārikaṃ atthi rūpaṃ sukhumaṃ . atthi rūpaṃ dūre atthi rūpaṃ santike .pe. atthi rūpaṃ kabaḷiṅkāro āhāro atthi rūpaṃ na kabaḷiṅkāro āhāro . evaṃ duvidhena rūpakkhandho.

[35] Tividhena rūpakkhandho yantaṃ rūpaṃ ajjhattikaṃ taṃ upādā yantaṃ rūpaṃ bāhiraṃ taṃ atthi upādā atthi anupādā . yantaṃ rūpaṃ ajjhattikaṃ taṃ upādinnaṃ yantaṃ rūpaṃ bāhiraṃ taṃ atthi upādinnaṃ atthi anupādinnaṃ . yantaṃ rūpaṃ ajjhattikaṃ taṃ upādinnupādāniyaṃ yantaṃ rūpaṃ bāhiraṃ taṃ atthi upādinnupādāniyaṃ atthi anupādinnupādāniyaṃ .pe. Yantaṃ rūpaṃ ajjhattikaṃ taṃ na kabaḷiṅkāro āhāro yantaṃ rūpaṃ bāhiraṃ Taṃ atthi kabaḷiṅkāro āhāro atthi na kabaḷiṅkāro āhāro evaṃ tividhena rūpakkhandho.