[542] Satta bojjhaṅgā satisambojjhaṅgo dhammavicayasambojjhaṅgo viriyasambojjhaṅgo pītisambojjhaṅgo passaddhisambojjhaṅgo samādhisambojjhaṅgo upekkhāsambojjhaṅgo.

[543] Tattha katamo satisambojjhaṅgo idha bhikkhu satimā hoti paramena satinepakkena samannāgato cirakatampi cirabhāsitampi saritā anussaritā ayaṃ vuccati satisambojjhaṅgo . so tathāsato viharanto taṃ dhammaṃ paññāya vicinati pavicinati parivīmaṃsaṃ āpajjati ayaṃ vuccati dhammavicayasambojjhaṅgo . tassa taṃ dhammaṃ paññāya vicinato pavicinato parivīmaṃsaṃ āpajjato āraddhaṃ hoti viriyaṃ asallīnaṃ ayaṃ vuccati viriyasambojjhaṅgo . āraddhaviriyassa uppajjati pīti nirāmisā ayaṃ vuccati pītisambojjhaṅgo . pītimanassa kāyopi passambhati cittaṃpi passambhati ayaṃ vuccati passaddhisambojjhaṅgo . Passaddhakāyassa sukhino cittaṃ samādhiyati ayaṃ vuccati samādhisambojjhaṅgo. So tathāsamāhitaṃ cittaṃ sādhukaṃ ajjhupekkhitā hoti ayaṃ vuccati upekkhāsambojjhaṅgo.

[544] Satta bojjhaṅgā satisambojjhaṅgo dhammavicayasambojjhaṅgo viriyasambojjhaṅgo pītisambojjhaṅgo passaddhisambojjhaṅgo samādhisambojjhaṅgo upekkhāsambojjhaṅgo.

[545] Tattha katamo satisambojjhaṅgo atthi ajjhattaṃ dhammesu sati atthi bahiddhā dhammesu sati . yadapi ajjhattaṃ dhammesu sati tadapi satisambojjhaṅgo abhiññāya sambodhāya nibbānāya saṃvattati . yadapi bahiddhā dhammesu sati tadapi satisambojjhaṅgo abhiññāya sambodhāya nibbānāya saṃvattati.