[36] Catubbidhena rūpakkhandho yantaṃ rūpaṃ upādā taṃ atthi upādinnaṃ atthi anupādinnaṃ yantaṃ rūpaṃ anupādā taṃ atthi upādinnaṃ atthi anupādinnaṃ . yantaṃ rūpaṃ upādā taṃ atthi upādinnupādāniyaṃ atthi anupādinnupādāniyaṃ yantaṃ rūpaṃ anupādā taṃ atthi upādinnupādāniyaṃ atthi anupādinnupādāniyaṃ . yantaṃ rūpaṃ upādā taṃ atthi sappaṭighaṃ atthi appaṭighaṃ yantaṃ rūpaṃ anupādā taṃ atthi sappaṭighaṃ atthi appaṭighaṃ . yantaṃ rūpaṃ upādā taṃ atthi oḷārikaṃ atthi sukhumaṃ yantaṃ rūpaṃ anupādā taṃ atthi oḷārikaṃ atthi sukhumaṃ . Yantaṃ rūpaṃ upādā taṃ atthi dūre atthi santike yantaṃ rūpaṃ anupādā taṃ atthi dūre atthi santike .pe. diṭṭhaṃ sutaṃ mutaṃ viññātaṃ evaṃ catubbidhena rūpakkhandho.

[37] Pañcavidhena rūpakkhandho paṭhavīdhātu āpodhātu tejodhātu vāyodhātu yañca rūpaṃ upādā evaṃ pañcavidhena rūpakkhandho.

[38] Chabbidhena rūpakkhandho cakkhuviññeyyaṃ rūpaṃ sotaviññeyyaṃ rūpaṃ ghānaviññeyyaṃ rūpaṃ jivhāviññeyyaṃ rūpaṃ kāyaviññeyyaṃ rūpaṃ manoviññeyyaṃ rūpaṃ evaṃ chabbidhena rūpakkhandho.

[39] Sattavidhena rūpakkhandho cakkhuviññeyyaṃ rūpaṃ .pe. Manodhātu- viññeyyaṃ rūpaṃ manoviññāṇadhātuviññeyyaṃ rūpaṃ evaṃ sattavidhena Rūpakkhandho.