[40] Aṭṭhavidhena rūpakkhandho cakkhuviññeyyaṃ rūpaṃ .pe. Kāyaviññeyyaṃ rūpaṃ atthi sukhasamphassaṃ atthi dukkhasamphassaṃ manodhātuviññeyyaṃ rūpaṃ manoviññāṇadhātuviññeyyaṃ rūpaṃ evaṃ aṭṭhavidhena rūpakkhandho.

[41] Navavidhena rūpakkhandho cakkhundriyaṃ sotindriyaṃ ghānindriyaṃ jivhindriyaṃ kāyindriyaṃ itthindriyaṃ purisindriyaṃ jīvitindriyaṃ yañca rūpaṃ na indriyaṃ evaṃ navavidhena rūpakkhandho.

[42] Dasavidhena rūpakkhandho cakkhundriyaṃ .pe. jīvitindriyaṃ na indriyaṃ rūpaṃ atthi sappaṭighaṃ atthi appaṭighaṃ evaṃ dasavidhena rūpakkhandho.

[43] Ekādasavidhena rūpakkhandho cakkhāyatanaṃ sotāyatanaṃ ghānāyatanaṃ jivhāyatanaṃ kāyāyatanaṃ rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ yañca rūpaṃ anidassanaṃ appaṭighaṃ dhammāyatanapariyāpannaṃ evaṃ ekādasavidhena rūpakkhandho. Ayaṃ vuccati rūpakkhandho.