[452] Anupassīti tattha katamā anupassanā yā paññā pajānanā .pe. amoho dhammavicayo sammādiṭṭhi ayaṃ vuccati anupassanā imāya anupassanāya upeto hoti samupeto upāgato samupāgato upapanno samupapanno samannāgato tena vuccati anupassīti.

[453] Viharatīti iriyati vattati pāleti yapeti yāpeti carati viharati tena vuccati viharatīti.

[454] Ātāpīti tattha katamaṃ ātappaṃ yo cetasiko viriyārambho .pe. sammāvāyāmo idaṃ vuccati ātappaṃ iminā ātappena upeto hoti .pe. Samannāgato tena vuccati ātāpīti.

[455] Sampajānoti tattha katamaṃ sampajaññaṃ yā paññā pajānanā .pe. amoho dhammavicayo sammādiṭṭhi idaṃ vuccati sampajaññaṃ iminā sampajaññena upeto hoti .pe. samannāgato tena vuccati sampajānoti.