[630] Abyāpannacittoti tattha katamaṃ cittaṃ yaṃ cittaṃ mano mānasaṃ .pe. tajjā manoviññāṇadhātu idaṃ vuccati cittaṃ idaṃ cittaṃ abyāpannaṃ hoti tena vuccati abyāpannacittoti.

[631] Viharatīti iriyati .pe. Viharati tena vuccati viharatīti.

[632] Byāpādapadosā cittaṃ parisodhetīti atthi byāpādo atthi padoso . tattha katamo byāpādo yo cittassa āghāto paṭighāto paṭighaṃ paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṃ doso dūsanā dūsitattaṃ byāpatti byāpajjanā byāpajjitattaṃ virodho paṭivirodho caṇḍikkaṃ assuropo anattamanatā cittassa ayaṃ vuccati byāpādo . tattha katamo padoso yo byāpādo so padoso yo padoso so byāpādo . tattha katamaṃ cittaṃ yaṃ cittaṃ mano mānasaṃ .pe. tajjā manoviññāṇadhātu Idaṃ vuccati cittaṃ . idaṃ cittaṃ imamhā byāpādapadosā sodheti visodheti parisodheti moceti vimoceti parimoceti tena vuccati byāpādapadosā cittaṃ parisodhetīti.

[633] Thīnamiddhaṃ pahāyāti atthi thīnaṃ atthi middhaṃ . tattha katamaṃ thīnaṃ yā cittassa akalyatā akammaññatā olīyanā sallīyanā līnaṃ līyanā līyitattaṃ thīnaṃ thīyanā thīyitattaṃ cittassa idaṃ vuccati thīnaṃ . tattha katamaṃ middhaṃ yā kāyassa akalyatā akammaññatā onāho pariyonāho antosamorodho middhaṃ soppaṃ pacalāyikā soppaṃ supanā supitattaṃ idaṃ vuccati middhaṃ . iti idañca thīnaṃ idañca middhaṃ santā honti samitā vūpasantā atthaṅgatā abbhatthaṅgatā appitā byappitā sositā visositā byantīkatā tena vuccati thīnamiddhaṃ pahāyāti.