[666] Jhānanti sampasādo pīti sukhaṃ cittassa ekaggatā.

[667] Upasampajjāti yo dutiyassa jhānassa lābho paṭilābho patti sampatti phusanā sacchikiriyā upasampadā.

[668] Viharatīti iriyati .pe. Viharati tena vuccati viharatīti.

[669] Pītiyā ca virāgāti tattha katamā pīti yā pīti pāmojjaṃ āmodanā pamodanā hāso pahāso vitti odagyaṃ attamanatā cittassa ayaṃ vuccati pīti ayaṃ pīti santā hoti samitā vūpasantā atthaṅgatā abbhatthaṅgatā appitā byappitā sositā visositā byantīkatā tena vuccati pītiyā ca virāgāti.