[739] Na hetū sahetukā hetusampayuttā na vattabbā hetū ceva sahetukā cāti sahetukā ceva na ca hetū na vattabbā hetū ceva hetusampayuttā cāti hetusampayuttā ceva na ca hetū na hetū sahetukā . sappaccayā saṅkhatā anidassanā appaṭighā Arūpā siyā lokiyā siyā lokuttarā kenaci viññeyyā kenaci na viññeyyā . no āsavā siyā sāsavā siyā anāsavā āsavavippayuttā na vattabbā āsavā ceva sāsavā cāti siyā sāsavā ceva no ca āsavā siyā na vattabbā sāsavā ceva no ca āsavāti na vattabbā āsavā ceva āsavasampayuttā cātipi āsavasampayuttā ceva no ca āsavātipi siyā āsavavippayuttasāsavā siyā āsavavippayuttaanāsavā. {739.1} No saññojanā .pe. No ganthā .pe. No oghā .pe. No yogā .pe. No nīvaraṇā .pe. No parāmāsā .pe. Sārammaṇā no cittā cetasikā cittasampayuttā cittasaṃsaṭṭhā cittasamuṭṭhānā cittasahabhuno cittānuparivattino cittasaṃsaṭṭhasamuṭṭhānā cittasaṃsaṭṭhasamuṭṭhānasahabhuno cittasaṃsaṭṭhānānuparivattino bāhirā nupādā siyā upādinnā siyā anupādinnā. Nupādānā .pe. No kilesā .pe.

[740] Na dassanena pahātabbā na bhāvanāya pahātabbā na dassanena pahātabbahetukā na bhāvanāya pahātabbahetukā . Paṭhamaṃ jhānaṃ etthuppannaṃ vitakkaṃ ṭhapetvā savitakkaṃ tīṇi jhānā avitakkā . paṭhamaṃ jhānaṃ etthuppannaṃ vicāraṃ ṭhapetvā savicāraṃ tīṇi jhānā avicārā . dve jhānā etthuppannaṃ pītiṃ ṭhapetvā sappītikā dve jhānā appītikā . dve jhānā etthuppannaṃ pītiṃ Ṭhapetvā pītisahagatā dve jhānā na pītisahagatā . tīṇi jhānā etthuppannaṃ sukhaṃ ṭhapetvā sukhasahagatā catutthaṃ jhānaṃ na sukhasahagataṃ . Catutthaṃ jhānaṃ etthuppannaṃ upekkhaṃ ṭhapetvā upekkhāsahagataṃ tīṇi jhānā na upekkhāsahagatā . na kāmāvacarā siyā rūpāvacarā siyā na rūpāvacarā . tīṇi jhānā na arūpāvacarā catutthaṃ jhānaṃ siyā arūpāvacaraṃ siyā na arūpāvacaraṃ . siyā pariyāpannā siyā apariyāpannā siyā niyyānikā siyā aniyyānikā siyā niyatā siyā aniyatā siyā sauttarā siyā anuttarā araṇāti. Pañhāpucchakaṃ. Jhānavibhaṅgo samatto. ----------