[9] Tattha katamā vedanā atītā yā vedanā atītā niruddhā vigatā vipariṇatā atthaṅgatā abbhatthaṅgatā uppajjitvā vigatā atītā atītaṃsena saṅgahitā sukhā vedanā dukkhā vedanā adukkhamasukhā vedanā ayaṃ vuccati vedanā atītā . tattha katamā vedanā anāgatā yā vedanā ajātā abhūtā asañjātā anibbattā anabhinibbattā apātubhūtā anuppannā asamuppannā anuṭṭhitā asamuṭṭhitā anāgatā anāgataṃsena saṅgahitā sukhā vedanā dukkhā vedanā adukkhamasukhā vedanā ayaṃ vuccati vedanā anāgatā . Tattha katamā vedanā paccuppannā yā vedanā jātā bhūtā Sañjātā nibbattā abhinibbattā pātubhūtā uppannā samuppannā uṭṭhitā samuṭṭhitā paccuppannā paccuppannaṃsena saṅgahitā sukhā vedanā dukkhā vedanā adukkhamasukhā vedanā ayaṃ vuccati vedanā paccuppannā.

[10] Tattha katamā vedanā ajjhattā yā vedanā tesaṃ tesaṃ sattānaṃ ajjhattaṃ paccattaṃ niyakā pāṭipuggalikā upādinnā sukhā vedanā dukkhā vedanā adukkhamasukhā vedanā ayaṃ vuccati vedanā ajjhattā . tattha katamā vedanā bahiddhā yā vedanā tesaṃ tesaṃ parasattānaṃ parapuggalānaṃ ajjhattaṃ paccattaṃ niyakā pāṭipuggalikā upādinnā sukhā vedanā dukkhā vedanā adukkhamasukhā vedanā ayaṃ vuccati vedanā bahiddhā.

[11] Tattha katamā vedanā oḷārikā sukhumā akusalā vedanā oḷārikā kusalābyākatā vedanā sukhumā kusalākusalā vedanā oḷārikā abyākatā vedanā sukhumā dukkhā vedanā oḷārikā sukhā ca adukkhamasukhā ca vedanā sukhumā sukhadukkhā vedanā oḷārikā adukkhamasukhā vedanā sukhumā asamāpannassa vedanā oḷārikā samāpannassa vedanā sukhumā sāsavā vedanā oḷārikā anāsavā vedanā sukhumā taṃ taṃ vā pana vedanaṃ upādāya upādāya vedanā oḷārikā sukhumā daṭṭhabbā.

[12] Tattha katamā vedanā hīnā paṇītā akusalā vedanā hīnā Kusalābyākatā vedanā paṇītā kusalākusalā vedanā hīnā abyākatā vedanā paṇītā dukkhā vedanā hīnā sukhā ca adukkhamasukhā ca vedanā paṇītā sukhadukkhā vedanā hīnā adukkhamasukhā vedanā paṇītā asamāpannassa vedanā hīnā samāpannassa vedanā paṇītā sāsavā vedanā hīnā anāsavā vedanā paṇītā taṃ taṃ vā pana vedanaṃ upādāya upādāya vedanā hīnā paṇītā daṭṭhabbā.