[896] Tattha katamo atimāno idhekacco jātiyā vā gottena vā kolaputtiyena vā .pe. aññataraññatarena vatthunā pare atimaññati yo evarūpo māno maññanā maññitattaṃ uṇṇati Uṇṇāmo dhajo sampaggāho ketukamyatā cittassa ayaṃ vuccati atimāno.

[897] Tattha katamo mānātimāno idhekacco jātiyā vā gottena vā kolaputtiyena vā .pe. aññataraññatarena vatthunā pubbakālaṃ parehi sadisaṃ attānaṃ dahati aparakālaṃ attānaṃ seyyaṃ dahati parehi hīnaṃ na dahati yo evarūpo māno maññanā maññitattaṃ uṇṇati uṇṇāmo dhajo sampaggāho ketukamyatā cittassa ayaṃ vuccati mānātimāno.

[898] Tattha katamo omāno idhekacco jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjaṭṭhānena vā sutena vā paṭibhāṇena vā aññataraññatarena vatthunā omānaṃ jappeti yo evarūpo omāno omaññanā omaññitattaṃ hīḷanā ohīḷanā ohīḷitattaṃ attuññā attāvaññā attaparibhavo ayaṃ vuccati omāno.

[899] Tattha katamo adhimāno appatte pattasaññitā akate katasaññitā anadhigate adhigatasaññitā asacchikate sacchikatasaññitā yo evarūpo māno maññanā maññitattaṃ uṇṇati uṇṇāmo dhajo sampaggāho ketukamyatā cittassa ayaṃ vuccati adhimāno.