[900] Tattha katamo asmimāno rūpe asmīti māno asmīti Chando asmīti anusayo vedanāya .pe. saññāya .pe. Saṅkhāresu .pe. viññāṇe asmīti māno asmīti chando asmīti anusayo yo evarūpo māno maññanā maññitattaṃ uṇṇati uṇṇāmo dhajo sampaggāho ketukamyatā cittassa ayaṃ vuccati asmimāno.

[901] Tattha katamo micchāmāno idhekacco pāpakena vā kammāyatanena pāpakena vā sippāyatanena pāpakena vā vijjaṭṭhānena pāpakena vā sutena pāpakena vā paṭibhāṇena pāpakena vā sīlena pāpakena vā vatena pāpakena vā sīlabbatena pāpikāya vā diṭṭhiyā aññataraññatarena vatthunā mānaṃ jappeti yo evarūpo māno maññanā maññitattaṃ uṇṇati uṇṇāmo dhajo sampaggāho ketukamyatā cittassa ayaṃ vuccati micchāmāno.

[902] Tattha katamo ñātivitakko ñātake ārabbha gehasito takko vitakko .pe. Micchāsaṅkappo ayaṃ vuccati ñātivitakko.

[903] Tattha katamo janapadavitakko janapadaṃ ārabbha gehasito takko vitakko .pe. Micchāsaṅkappo ayaṃ vuccati janapadavitakko.