[916] Tattha katamā pubbantānudiṭṭhi pubbantaṃ ārabbha yā uppajjati diṭṭhi diṭṭhigataṃ .pe. vipariyesaggāho ayaṃ vuccati pubbantānudiṭṭhi . tattha katamā aparantānudiṭṭhi aparantaṃ ārabbha yā uppajjati diṭṭhi diṭṭhigataṃ .pe. vipariyesaggāho ayaṃ vuccati aparantānudiṭṭhi.

[917] Tattha katamaṃ ahirikaṃ yaṃ na hiriyati hiriyitabbena na hiriyati pāpakānaṃ akusalānaṃ dhammānaṃ samāpattiyā idaṃ vuccati ahirikaṃ . Tattha katamaṃ anottappaṃ yaṃ na ottappati ottappitabbena na ottappati pāpakānaṃ akusalānaṃ dhammānaṃ samāpattiyā idaṃ vuccati anottappaṃ.

[918] Tattha katamā dovacassatā sahadhammike vuccamāne dovacassāyaṃ dovacassiyaṃ dovacassatā vippaṭikūlagāhitā vipaccanīkasātatā anādariyaṃ anādaratā agāravatā appaṭissavatā ayaṃ vuccati dovacassatā . tattha katamā pāpamittatā ye te puggalā assaddhā dussīlā appassutā maccharino duppaññā yā tesaṃ sevanā nisevanā saṃsevanā bhajanā sambhajanā bhatti sambhatti sampavaṅkatā ayaṃ vuccati pāpamittatā.

[919] Tattha katamo anājjavo yo anājjavo anājjavatā jimhatā vaṅkatā kuṭilatā ayaṃ vuccati anājjavo . tattha katamo Amaddavo yā amudutā amaddavatā kakkhaḷiyaṃ phārusiyaṃ kakkhaḷatā kathinatā ujucittatā amudutā ayaṃ vuccati amaddavo.