[938] Tattha katamāni tīṇi bhayāni jātibhayaṃ jarābhayaṃ maraṇabhayaṃ. Tattha katamaṃ jātibhayaṃ jātiṃ paṭicca bhayaṃ bhayānakaṃ chambhitattaṃ lomahaṃso cetaso utrāso idaṃ vuccati jātibhayaṃ . tattha katamaṃ jarābhayaṃ jaraṃ paṭicca bhayaṃ bhayānakaṃ chambhitattaṃ lomahaṃso cetaso utrāso idaṃ vuccati jarābhayaṃ . tattha katamaṃ maraṇabhayaṃ maraṇaṃ paṭicca bhayaṃ bhayānakaṃ chambhitattaṃ lomahaṃso cetaso utrāso idaṃ vuccati maraṇabhayaṃ. Imāni tīṇi bhayāni.

[939] Tattha katamāni tīṇi tamāni atītaṃ addhānaṃ ārabbha kaṅkhati vicikicchati nādhimuccati na sampasīdati anāgataṃ addhānaṃ ārabbha kaṅkhati vicikicchati nādhimuccati na sampasīdati paccuppannaṃ addhānaṃ ārabbha kaṅkhati vicikicchati nādhimuccati na sampasīdati imāni tīṇi tamāni.

[940] Tattha katamāni tīṇi titthāyatanāni idhekacco samaṇo vā brāhmaṇo vā evaṃvādī hoti evaṃdiṭṭhi yaṅkiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbantaṃ pubbe katahetūti idha panekacco samaṇo vā brāhmaṇo vā evaṃvādī hoti evaṃdiṭṭhi yaṅkiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbantaṃ issaranimmānahetūti idha panekacco Samaṇo vā brāhmaṇo vā evaṃvādī hoti evaṃdiṭṭhi yaṅkiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbantaṃ ahetuappaccayāti imāni tīṇi titthāyatanāni.

[941] Tattha katame tayo kiñcanā rāgo kiñcanaṃ doso kiñcanaṃ moho kiñcanaṃ ime tayo kiñcanā.