[980] Tattha katame pañca sallā rāgasallaṃ dosasallaṃ mohasallaṃ mānasallaṃ diṭṭhisallaṃ ime pañca sallā.

[981] Tattha katame pañca cetokhilā satthari kaṅkhati vicikicchati Nādhimuccati na sampasīdati dhamme kaṅkhati vicikicchati nādhimuccati na sampasīdati saṅghe kaṅkhati vicikicchati nādhimuccati na sampasīdati sikkhāya kaṅkhati vicikicchati nādhimuccati na sampasīdati sabrahmacārīsu kupito hoti anattamano āhatacitto khilajāto ime pañca cetokhilā.

[982] Tattha katame pañca cetaso vinibandhā kāme avītarāgo hoti avigatacchando avigatapemo avigatapipāso avigatapariḷāho avigatataṇho kāye avītarāgo hoti avigatacchando avigatapemo avigatapipāso avigatapariḷāho avigatataṇho rūpe avītarāgo hoti avigatacchando avigatapemo avigatapipāso avigatapariḷāho avigatataṇho yāvadatthaṃ udarāvadehakaṃ bhuñjitvā seyyasukhaṃ passasukhaṃ middhasukhaṃ anuyutto viharati aññataraṃ devakāyaṃ paṇidhāya brahmacariyaṃ carati imināhaṃ sīlena vā vatena vā tapena vā brahmacariyena vā devo vā bhavissāmi devaññataro vāti ime pañca cetaso vinibandhā.

[983] Tattha katamāni pañca nīvaraṇāni kāmacchandanīvaraṇaṃ byāpādanīvaraṇaṃ thīnamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ imāni pañca nīvaraṇāni.