[1041] Kathañca aññathā bhavissanti hoti paraṃ puggalaṃ upanidhāya yathā so khattiyo nāhaṃ tathā khattiyo bhavissanti vā yathā so brāhmaṇo nāhaṃ tathā brāhmaṇo bhavissanti vā .pe. Yathā so nevasaññīnāsaññī nāhaṃ tathā nevasaññīnāsaññī bhavissanti vā evaṃ aññathā bhavissanti hoti.

[1042] Kathañca asasmīti hoti kañci dhammaṃ anavakāriṃ karitvā rūpaṃ vedanaṃ saññaṃ saṅkhāre viññāṇaṃ niccosmi dhuvosmi sassatosmi avipariṇāmadhammosmīti evaṃ asasmīti hoti.

[1043] Kathañca sātasmīti hoti kañci dhammaṃ anavakāriṃ karitvā rūpaṃ vedanaṃ saññaṃ saṅkhāre viññāṇaṃ ucchijjissāmi vinassissāmi na bhavissāmīti evaṃ sātasmīti hoti.

[1044] Kathañca siyanti hoti kañci dhammaṃ anavakāriṃ karitvā rūpaṃ vedanaṃ saññaṃ saṅkhāre viññāṇaṃ siyanti chandaṃ paṭilabhati siyanti mānaṃ paṭilabhati siyanti diṭṭhiṃ paṭilabhati tasmiṃ sati imāni papañcitāni honti itthaṃ siyanti vā evaṃ siyanti vā aññathā siyanti vā.