[1049] Kathañca apāhaṃ itthaṃ siyanti hoti apāhaṃ khattiyo siyanti vā apāhaṃ brāhmaṇo siyanti vā apāhaṃ vesso siyanti vā apāhaṃ suddo siyanti vā apāhaṃ gahaṭṭho siyanti vā apāhaṃ pabbajito siyanti vā apāhaṃ devo siyanti vā apāhaṃ manusso siyanti vā apāhaṃ rūpī siyanti vā apāhaṃ arūpī siyanti vā apāhaṃ saññī siyanti vā apāhaṃ asaññī siyanti vā apāhaṃ nevasaññīnāsaññī siyanti vā evaṃ apāhaṃ itthaṃ siyanti hoti.

[1050] Kathañca apāhaṃ evaṃ siyanti hoti paraṃ puggalaṃ upanidhāya yathā so khattiyo apāhaṃ tathā khattiyo siyanti vā yathā so Brāhmaṇo apāhaṃ tathā brāhmaṇo siyanti vā .pe. yathā so nevasaññīnāsaññī apāhaṃ tathā nevasaññīnāsaññī siyanti vā evaṃ apāhaṃ evaṃ siyanti hoti.

[1051] Kathañca apāhaṃ aññathā siyanti hoti paraṃ puggalaṃ upanidhāya yathā so khattiyo apāhaṃ na tathā khattiyo siyanti vā yathā so brāhmaṇo apāhaṃ na tathā brāhmaṇo siyanti vā .pe. Yathā so nevasaññīnāsaññī apāhaṃ na tathā nevasaññīnāsaññī siyanti vā evaṃ apāhaṃ aññathā siyanti hoti. Imāni aṭṭhārasa taṇhāvicaritāni ajjhattikassa upādāya.

[1052] Tattha katamāni aṭṭhārasa taṇhāvicaritāni bāhirassa upādāya . iminā asmīti hoti iminā itthasmīti hoti iminā evasmīti hoti iminā aññathāsmīti hoti iminā bhavissanti hoti iminā itthaṃ bhavissanti hoti iminā evaṃ bhavissanti hoti iminā aññathā bhavissanti hoti iminā asasmīti hoti iminā sātasmīti hoti iminā siyanti hoti iminā itthaṃ siyanti hoti iminā evaṃ siyanti hoti iminā aññathā siyanti hoti iminā apāhaṃ siyanti hoti iminā apāhaṃ itthaṃ siyanti hoti iminā apāhaṃ evaṃ siyanti hoti iminā apāhaṃ aññathā siyanti hoti.