[1053] Kathañca iminā asmīti hoti kañci dhammaṃ avakāriṃ karitvā rūpaṃ vedanaṃ saññaṃ saṅkhāre viññāṇaṃ iminā asmīti chandaṃ Paṭilabhati iminā asmīti mānaṃ paṭilabhati iminā asmīti diṭṭhiṃ paṭilabhati tasmiṃ sati imāni papañcitāni honti iminā itthasmīti vā iminā evasmīti vā iminā aññathāsmīti vā.

[1054] Kathañca iminā itthasmīti hoti iminā khattiyosmīti vā iminā brāhmaṇosmīti vā iminā vessosmīti vā iminā suddosmīti vā iminā gahaṭṭhosmīti vā iminā pabbajitosmīti vā iminā devosmīti vā iminā manussosmīti vā iminā rūpīsmīti vā iminā arūpīsmīti vā iminā saññīsmīti vā iminā asaññīsmīti vā iminā nevasaññīnāsaññīsmīti vā evaṃ iminā itthasmīti hoti.

[1055] Kathañca iminā evasmīti hoti paraṃ puggalaṃ upanidhāya yathā so khattiyo iminā tathāhaṃ khattiyosmīti vā yathā so brāhmaṇo iminā tathāhaṃ brāhmaṇosmīti vā .pe. yathā so nevasaññīnāsaññī iminā tathāhaṃ nevasaññīnāsaññīsmīti vā evaṃ iminā evasmīti hoti.

[1056] Kathañca iminā aññathāsmīti hoti paraṃ puggalaṃ upanidhāya yathā so khattiyo iminā nāhaṃ tathā khattiyosmīti vā yathā so brāhmaṇo iminā nāhaṃ tathā brāhmaṇosmīti vā .pe. yathā so nevasaññīnāsaññī iminā nāhaṃ tathā nevasaññī- nāsaññīsmīti vā evaṃ iminā aññathāsmīti hoti.