[224] Rūpakkhandho katīhi khandhehi katīhāyatanehi katīhi dhātūhi sampayuttoti . natthi . katīhi vippayutto . catūhi khandhehi ekenāyatanena sattahi dhātūhi vippayutto ekenāyatanena ekāya dhātuyā kehici vippayutto.

[225] Vedanākkhandho saññākkhandho saṅkhārakkhandho tīhi khandhehi ekenāyatanena sattahi dhātūhi sampayutto ekenāyatanena ekāya dhātuyā kehici sampayutto . katīhi vippayutto . ekena khandhena dasahāyatanehi dasahi dhātūhi vippayutto ekenāyatanena ekāya dhātuyā kehici vippayutto.

[226] Viññāṇakkhandho tīhi khandhehi sampayutto ekenāyatanena ekāya dhātuyā kehici sampayutto . katīhi vippayutto . ekena khandhena dasahāyatanehi dasahi dhātūhi vippayutto ekenāyatanena ekāya dhātuyā kehici vippayutto.

[227] Cakkhvāyatanaṃ .pe. phoṭṭhabbāyatanaṃ sampayuttanti . Natthi . katīhi vippayuttaṃ . catūhi khandhehi ekenāyatanena sattahi dhātūhi vippayuttaṃ ekenāyatanena ekāya dhātuyā kehici vippayuttaṃ.