[425] Upāyāsena ye dhammā satipaṭṭhānena ye dhammā sammappadhānena ye dhammā sampayuttā te dhammā catūhi khandhehi dvīhāyatanehi dvīhi dhātūhi saṅgahitā . katīhi asaṅgahitā . ekena khandhena dasahāyatanehi soḷasahi dhātūhi asaṅgahitā.

[426] Iddhipādena ye dhammā sampayuttā te dhammā tīhi khandhehi ekenāyatanena ekāya dhātuyā saṅgahitā. Katīhi asaṅgahitā. Dvīhi khandhehi ekādasahāyatanehi sattarasahi dhātūhi asaṅgahitā.

[427] Jhānena ye dhammā sampayuttā te dhammā tīhi khandhehi dvīhāyatanehi dvīhi dhātūhi saṅgahitā . katīhi asaṅgahitā . Dvīhi khandhehi dasahāyatanehi soḷasahi dhātūhi asaṅgahitā.

[428] Appamaññāya ye dhammā pañcahi indriyehi ye dhammā pañcahi balehi ye dhammā sattahi bojjhaṅgehi ye dhammā ariyena aṭṭhaṅgikena maggena ye dhammā sampayuttā Te dhammā catūhi khandhehi dvīhāyatanehi dvīhi dhātūhi saṅgahitā . Katīhi asaṅgahitā . ekena khandhena dasahāyatanehi soḷasahi dhātūhi asaṅgahitā.