[54] Cakkhundriyañca jīvitindriyañca dvīhi khandhehi dvīhāyatanehi dvīhi dhātūhi saṅgahitā . katīhi asaṅgahitā . tīhi khandhehi dasahāyatanehi soḷasahi dhātūhi asaṅgahitā.

[55] Cakkhundriyañca sukhindriyañca cakkhundriyañca dukkhindriyañca cakkhundriyañca somanassindriyañca cakkhundriyañca domanassindriyañca cakkhundriyañca upekkhindriyañca cakkhundriyañca saddhindriyañca cakkhundriyañca viriyindriyañca cakkhundriyañca satindriyañca cakkhundriyañca samādhindriyañca cakkhundriyañca paññindriyañca cakkhundriyañca anaññātaññassāmītindriyañca cakkhundriyañca aññindriyañca cakkhundriyañca aññātāvindriyañca dvīhi khandhehi dvīhāyatanehi dvīhi dhātūhi saṅgahitā . katīhi asaṅgahitā . Tīhi khandhehi dasahāyatanehi soḷasahi dhātūhi asaṅgahitā.

[56] Bāvīsatindriyāni katīhi khandhehi katīhāyatanehi katīhi dhātūhi saṅgahitāni . bāvīsatindriyāni catūhi khandhehi sattahāyatanehi terasahi dhātūhi saṅgahitāni . katīhi asaṅgahitāni . ekena khandhena pañcahāyatanehi pañcahi dhātūhi asaṅgahitāni.

[57] Avijjā ekena khandhena ekenāyatanena ekāya dhātuyā saṅgahitā . katīhi asaṅgahitā . catūhi khandhehi ekādasahāyatanehi sattarasahi dhātūhi asaṅgahitā.