[108] Katamo ca puggalo ugghaṭitaññū yassa puggalassa saha udāhaṭavelāya dhammābhisamayo hoti ayaṃ vuccati puggalo ugghaṭitaññū. {108.1} Katamo ca puggalo vipañcitaññū yassa puggalassa saṅkhittena bhāsitassa vitthārena atthe vibhajiyamāne dhammābhisamayo hoti ayaṃ vuccati puggalo vipañcitaññū. {108.2} Katamo ca puggalo neyyo yassa puggalassa uddesato paripucchato yoniso manasikaroto kalyāṇamitte sevato bhajato payirupāsato evaṃ anupubbena dhammābhisamayo hoti ayaṃ vuccati puggalo neyyo. {108.3} Katamo ca puggalo padaparamo yassa puggalassa bahumpi suṇato bahumpi bhaṇato bahumpi dhārayato bahumpi vācayato na tāya jātiyā dhammābhisamayo hoti ayaṃ vuccati puggalo padaparamo.

[109] Katamo ca puggalo yuttapaṭibhāṇo no muttapaṭibhāṇo idhekacco puggalo pañhaṃ puṭṭho samāno yuttaṃ vadati no sīghaṃ Ayaṃ vuccati puggalo yuttapaṭibhāṇo no muttapaṭibhāṇo. {109.1} Katamo ca puggalo muttapaṭibhāṇo no yuttapaṭibhāṇo idhekacco puggalo pañhaṃ puṭṭho samāno sīghaṃ vadati no yuttaṃ ayaṃ vuccati puggalo muttapaṭibhāṇo no yuttapaṭibhāṇo. {109.2} Katamo ca puggalo yuttapaṭibhāṇo ca muttapaṭibhāṇo ca idhekacco puggalo pañhaṃ puṭṭho samāno yuttañca vadati sīghañca ayaṃ vuccati puggalo yuttapaṭibhāṇo ca muttapaṭibhāṇo ca. {109.3} Katamo ca puggalo neva yuttapaṭibhāṇo no muttapaṭibhāṇo idhekacco puggalo pañhaṃ puṭṭho samāno neva yuttaṃ vadati no sīghaṃ ayaṃ vuccati puggalo neva yuttapaṭibhāṇo no muttapaṭibhāṇo.

[110] Tattha katame cattāro dhammakathikā puggalā idhekacco dhammakathiko appañca bhāsati asahitañca parisā cassa akusalā hoti sahitāsahitassa evarūpo dhammakathiko evarūpāya parisāya dhammakathikotveva saṅkhaṃ gacchati. {110.1} Idha panekacco dhammakathiko appañca bhāsati sahitañca parisā cassa kusalā hoti sahitāsahitassa evarūpo dhammakathiko evarūpāya parisāya dhammakathikotveva saṅkhaṃ gacchati. {110.2} Idha panekacco dhammakathiko bahuñca bhāsati asahitañca parisā cassa akusalā hoti sahitāsahitassa evarūpo dhammakathiko evarūpāya parisāya dhammakathikotveva saṅkhaṃ gacchati. {110.3} Idha panekacco dhammakathiko bahuñca bhāsati sahitañca parisā cassa kusalā hoti sahitāsahitassa Evarūpo dhammakathiko evarūpāya parisāya dhammakathikotveva saṅkhaṃ gacchati. Ime cattāro dhammakathikā puggalā. Tattha katame cattāro valāhakūpamā puggalā.