[121] Cattāro balibaddhā sakagavacaṇḍo no paragavacaṇḍo paragavacaṇḍo no sakagavacaṇḍo sakagavacaṇḍo ca paragavacaṇḍo ca neva sakagavacaṇḍo no paragavacaṇḍo.

[122] Evameva cattārome balibaddhūpamā puggalā santo saṃvijjamānā lokasmiṃ . katame cattāro . sakagavacaṇḍo no paragavacaṇḍo paragavacaṇḍo no sakagavacaṇḍo sakagavacaṇḍo ca paragavacaṇḍo ca neva sakagavacaṇḍo no paragavacaṇḍo. {122.1} Kathañca puggalo sakagavacaṇḍo hoti no paragavacaṇḍo idhekacco puggalo sakaparisaṃ Ubbejitā hoti no paraparisaṃ evaṃ puggalo sakagavacaṇḍo hoti no paragavacaṇḍo seyyathāpi so balibaddho sakagavacaṇḍo no paragavacaṇḍo tathūpamo ayaṃ puggalo. {122.2} Kathañca puggalo paragavacaṇḍo hoti no sakagavacaṇḍo idhekacco puggalo paraparisaṃ ubbejitā hoti no sakaparisaṃ evaṃ puggalo paragavacaṇḍo hoti no sakagavacaṇḍo seyyathāpi so balibaddho paragavacaṇḍo no sakagavacaṇḍo tathūpamo ayaṃ puggalo. {122.3} Kathañca puggalo sakagavacaṇḍo ca hoti paragavacaṇḍo ca idhekacco puggalo sakaparisañca ubbejitā hoti paraparisañca evaṃ puggalo sakagavacaṇḍo ca hoti paragavacaṇḍo ca seyyathāpi so balibaddho sakagavacaṇḍo ca paragavacaṇḍo ca tathūpamo ayaṃ puggalo. {122.4} Kathañca puggalo neva sakagavacaṇḍo hoti no paragavacaṇḍo idhekacco puggalo neva sakaparisaṃ ubbejitā hoti no paraparisaṃ evaṃ puggalo neva sakagavacaṇḍo hoti no paragavacaṇḍo seyyathāpi so balibaddho neva sakagavacaṇḍo no paragavacaṇḍo tathūpamo ayaṃ puggalo. Ime cattāro balibaddhūpamā puggalā santo saṃvijjamānā lokasmiṃ. Tattha katame cattāro āsivisūpamā puggalā.

[123] Cattāro āsivisā āgataviso no ghoraviso ghoraviso no āgataviso āgataviso ca ghoraviso ca neva āgataviso no ghoraviso.

[124] Evameva cattārome āsivisūpamā puggalā santo saṃvijjamānā lokasmiṃ . katame cattāro . āgataviso no ghoraviso ghoraviso no āgataviso āgataviso ca ghoraviso ca neva āgataviso no ghoraviso. {124.1} Kathañca puggalo āgataviso hoti no ghoraviso idhekacco puggalo abhiṇhaṃ kujjhati so ca khvassa kodho na ciraṃ dīgharattaṃ anuseti evaṃ puggalo āgataviso hoti no ghoraviso seyyathāpi so āsiviso āgataviso no ghoraviso tathūpamo ayaṃ puggalo. {124.2} Kathañca puggalo ghoraviso hoti no āgataviso idhekacco puggalo na heva kho abhiṇhaṃ kujjhati so ca khvassa kodho ciraṃ dīgharattaṃ anuseti evaṃ puggalo ghoraviso hoti no āgataviso seyyathāpi so āsiviso ghoraviso no āgataviso tathūpamo ayaṃ puggalo. {124.3} Kathañca puggalo āgataviso ca hoti ghoraviso ca idhekacco puggalo abhiṇhaṃ kujjhati so ca khvassa kodho ciraṃ dīgharattaṃ anuseti evaṃ puggalo āgataviso ca hoti ghoraviso ca seyyathāpi so āsiviso āgataviso ca ghoraviso ca tathūpamo ayaṃ puggalo. {124.4} Kathañca puggalo neva āgataviso hoti no ghoraviso idhekacco puggalo na heva kho abhiṇhaṃ kujjhati so ca khvassa kodho na ciraṃ dīgharattaṃ anuseti evaṃ puggalo neva āgataviso hoti no ghoraviso seyyathāpi so āsiviso neva āgataviso no ghoraviso tathūpamo ayaṃ puggalo . ime cattāro āsivisūpamā puggalā Santo saṃvijjamānā lokasmiṃ.