[141] Tatra yvāyaṃ puggalo ārambhati ca vippaṭisārī ca hoti tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti so evamassa vacanīyo āyasmato kho ārambhajā āsavā saṃvijjanti vippaṭisārajā āsavā pavaḍḍhanti sādhu vatāyasmā ārambhaje āsave pahāya vippaṭisāraje āsave paṭivinodetvā cittaṃ paññañca bhāvetu evamāyasmā amunā pañcamena puggalena samasamo bhavissatīti. {141.1} Tatra yvāyaṃ puggalo ārambhati na vippaṭisārī hoti tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti so evamassa vacanīyo āyasmato kho ārambhajā āsavā saṃvijjanti vippaṭisārajā āsavā nappavaḍḍhanti sādhu vatāyasmā ārambhaje āsave pahāya cittaṃ paññañca bhāvetu evamāyasmā amunā pañcamena puggalena samasamo bhavissatīti. {141.2} Tatra yvāyaṃ puggalo na ārambhati vippaṭisārī hoti tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti so evamassa vacanīyo āyasmato kho ārambhajā āsavā na saṃvijjanti Vippaṭisārajā āsavā pavaḍḍhanti sādhu vatāyasmā vippaṭisāraje āsave paṭivinodetvā cittaṃ paññañca bhāvetu evamāyasmā amunā pañcamena puggalena samasamo bhavissatīti. {141.3} Tatra yvāyaṃ puggalo na ārambhati na vippaṭisārī hoti tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti so evamassa vacanīyo āyasmato kho ārambhajā āsavā na saṃvijjanti vippaṭisārajā āsavā nappavaḍḍhanti sādhu vatāyasmā cittaṃ paññañca bhāvetu evamāyasmā amunā pañcamena puggalena samasamo bhavissatīti . Ime cattāro puggalā amunā pañcamena puggalena evaṃ ovadiyamānā evamanusāsiyamānā anupubbena āsavānaṃ khayaṃ pāpuṇanti.

[142] Kathañca puggalo datvā avajānāti idhekacco puggalo yassa puggalassa deti cīvarapiṇḍapātasenāsanagilānapaccayabhesajjaparikkhāraṃ tassa evaṃ hoti ahaṃ dammi ayaṃ pana paṭiggaṇhātīti tamenaṃ datvā avajānāti evaṃ puggalo datvā avajānāti. {142.1} Kathañca puggalo saṃvāsena avajānāti idhekacco puggalo yena puggalena saddhiṃ saṃvasati dve vā tīṇi vā vassāni tamenaṃ saṃvāsena avajānāti evaṃ puggalo saṃvāsena avajānāti. {142.2} Kathañca puggalo ādheyyamukho hoti idhekacco puggalo parassa vaṇṇe vā avaṇṇe vā bhāsiyamāne khippaññeva adhimuccitā hoti evaṃ puggalo ādheyyamukho Hoti. {142.3} Kathañca puggalo lolo hoti idhekacco puggalo ittarasaddho hoti ittarabhatti ittarapemo ittarappasādo evaṃ puggalo lolo hoti. {142.4} Kathañca puggalo mando momūho hoti idhekacco puggalo kusalākusale dhamme na jānāti sāvajjānavajje dhamme na jānāti hīnappaṇīte dhamme na jānāti kaṇhasukkasappaṭibhāge dhamme na jānāti evaṃ puggalo mando momūho hoti. Tattha katame pañca yodhājīvūpamā puggalā