[2] Rūpakkhandho katīhi khandhehi katīhāyatanehi katīhi dhātūhi saṅgahito . rūpakkhandho ekena khandhena ekādasahāyatanehi ekādasahi dhātūhi saṅgahito . katīhi asaṅgahito . catūhi khandhehi ekenāyatanena sattahi dhātūhi asaṅgahito.

[3] Vedanākkhandho katīhi khandhehi katīhāyatanehi katīhi dhātūhi saṅgahito . vedanākkhandho ekena khandhena ekenāyatanena ekāya dhātuyā saṅgahito . katīhi asaṅgahito. Catūhi khandhehi ekādasahāyatanehi sattarasahi dhātūhi asaṅgahito.

[4] Saññākkhandho katīhi khandhehi katīhāyatanehi katīhi dhātūhi saṅgahito . saññākkhandho ekena khandhena ekenāyatanena ekāya dhātuyā saṅgahito . katīhi asaṅgahito. Catūhi khandhehi ekādasahāyatanehi sattarasahi dhātūhi asaṅgahito.

[5] Saṅkhārakkhandho katīhi khandhehi katīhāyatanehi katīhi dhātūhi saṅgahito . saṅkhārakkhandho ekena khandhena ekenāyatanena ekāya dhātuyā saṅgahito . katīhi asaṅgahito. Catūhi khandhehi ekādasahāyatanehi sattarasahi dhātūhi asaṅgahito.