[207] Sanidassanasappaṭighehi dhammehi ye dhammā anidassanasappaṭighehi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā tehi dhammehi ye dhammā te dhammā catūhi khandhehi dvīhāyatanehi aṭṭhahi dhātūhi Asaṅgahitā.

[208] Hetūhi dhammehi ye dhammā hetūhi ceva sahetukehi ca dhammehi ye dhammā hetūhi ceva hetusampayuttehi ca dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā tehi dhammehi ye dhammā te dhammā dvīhi khandhehi ekādasahāyatanehi sattarasahi dhātūhi asaṅgahitā.

[209] Sahetukehi dhammehi ye dhammā hetusampayuttehi dhammehi ye dhammā sahetukehi ceva na ca hetūhi dhammehi ye dhammā hetusampayuttehi ceva na ca hetūhi dhammehi ye dhammā na hetūhi dhammehi sahetukehi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā tehi dhammehi ye dhammā te dhammā ekena khandhena dasahāyatanehi dasahi dhātūhi asaṅgahitā.

[210] Appaccayehi dhammehi ye dhammā asaṅkhatehi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā tehi dhammehi ye dhammā te dhammā dvīhi khandhehi ekādasahāyatanehi sattarasahi dhātūhi asaṅgahitā.