[248] Appamaññā pañcindriyāni pañca balāni satta bojjhaṅgā ariyo aṭṭhaṅgiko maggo tīhi khandhehi ekenāyatanena ekāya dhātuyā sampayutto ekena khandhena ekenāyatanena ekāya dhātuyā kehici sampayutto . katīhi vippayutto . Ekena khandhena dasahāyatanehi soḷasahi dhātūhi vippayutto ekenāyatanena ekāya dhātuyā kehici vippayutto.

[249] Phasso cetanā manasikāro tīhi khandhehi ekenāyatanena sattahi dhātūhi sampayutto ekena khandhena ekenāyatanena ekāya dhātuyā kehici sampayutto . katīhi vippayutto . ekena khandhena dasahāyatanehi dasahi dhātūhi vippayutto ekenāyatanena ekāya dhātuyā kehici vippayutto.

[250] Vedanā saññā tīhi khandhehi ekenāyatanena sattahi dhātūhi sampayuttā ekenāyatanena ekāya dhātuyā kehici sampayuttā . Katīhi vippayuttā . ekena khandhena dasahāyatanehi dasahi dhātūhi vippayuttā ekenāyatanena ekāya dhātuyā kehici vippayuttā.

[251] Cittaṃ tīhi khandhehi sampayuttaṃ ekenāyatanena ekāya dhātuyā kehici sampayuttaṃ . katīhi vippayuttaṃ . ekena khandhena dasahāyatanehi dasahi dhātūhi vippayuttaṃ ekenāyatanena ekāya dhātuyā kehici vippayuttaṃ.