[292] Saṅkiliṭṭhā dhammā kilesasampayuttā dhammā sampayuttāti . natthi . katīhi vippayuttā . ekena khandhena dasahāyatanehi soḷasahi dhātūhi vippayuttā ekenāyatanena ekāya dhātuyā kehici vippayuttā.

[293] Saṅkiliṭṭhā ceva no ca kilesā dhammā kilesasampayuttā ceva no ca kilesā dhammā ekena khandhena ekenāyatanena ekāya dhātuyā kehici sampayuttā . katīhi vippayuttā . ekena khandhena dasahāyatanehi soḷasahi dhātūhi vippayuttā ekenāyatanena ekāya dhātuyā kehici vippayuttā.

[294] Dassanena pahātabbā dhammā bhāvanāya pahātabbā dhammā dassanena pahātabbahetukā dhammā bhāvanāya pahātabbahetukā dhammā sampayuttāti . natthi . katīhi vippayuttā . Ekena khandhena dasahāyatanehi soḷasahi dhātūhi vippayuttā ekenāyatanena ekāya dhātuyā kehici vippayuttā.

[295] Savitakkā dhammā savicārā dhammā ekena khandhena ekenāyatanena ekāya dhātuyā kehici sampayuttā . katīhi vippayuttā . ekena khandhena dasahāyatanehi pannarasahi dhātūhi vippayuttā ekenāyatanena ekāya dhātuyā kehici vippayuttā.