[1242] Kusalena cittena samuṭṭhitaṃ kāyakammaṃ rūpaṃ kusalanti . Āmantā . sārammaṇaṃ atthi tassa āvajjanā ābhogo samannāhāro manasikāro cetanā patthanā paṇidhīti . na hevaṃ vattabbe .pe. Nanu anārammaṇaṃ natthi tassa āvajjanā ābhogo samannāhāro manasikāro cetanā patthanā paṇidhīti . āmantā . hañci anārammaṇaṃ natthi tassa āvajjanā .pe. paṇidhi no vata re vattabbe kusalena cittena samuṭṭhitaṃ kāyakammaṃ rūpaṃ kusalanti.

[1243] Kusalena cittena samuṭṭhito phasso kusalo sārammaṇo atthi tassa āvajjanā .pe. paṇidhīti . āmantā . kusalena cittena samuṭṭhitaṃ kāyakammaṃ rūpaṃ kusalaṃ sārammaṇaṃ atthi tassa āvajjanā .pe. paṇidhīti . na hevaṃ vattabbe .pe. kusalena cittena samuṭṭhitā vedanā .pe. saññā cetanā saddhā viriyaṃ sati samādhi .pe. paññā kusalā sārammaṇā atthi tāya āvajjanā .pe. paṇidhīti . āmantā . kusalena cittena samuṭṭhitaṃ kāyakammaṃ rūpaṃ kusalaṃ sārammaṇaṃ atthi tassa āvajjanā .pe. paṇidhīti na hevaṃ vattabbe .pe.

[1244] Kusalena cittena samuṭṭhitaṃ kāyakammaṃ rūpaṃ kusalaṃ anārammaṇaṃ natthi tassa āvajjanā .pe. paṇidhīti . āmantā . Kusalena cittena samuṭṭhito phasso kusalo anārammaṇo natthi tassa āvajjanā .pe. paṇidhīti . na hevaṃ vattabbe .pe. kusalena cittena samuṭṭhitaṃ kāyakammaṃ rūpaṃ kusalaṃ anārammaṇaṃ natthi tassa āvajjanā .pe. paṇidhīti . āmantā . kusalena cittena samuṭṭhitā vedanā .pe. saññā cetanā saddhā viriyaṃ sati samādhi .pe. Paññā kusalā anārammaṇā natthi tāya āvajjanā .pe. Paṇidhīti. Na hevaṃ vattabbe .pe.

[1245] Kusalena cittena samuṭṭhitaṃ kāyakammaṃ rūpaṃ kusalanti . Āmantā . yaṃ kiñci kusalena cittena samuṭṭhitaṃ rūpaṃ sabbantaṃ kusalanti. Na hevaṃ vattabbe .pe.