[17] Puggalo upalabbhati sacchikaṭṭhaparamaṭṭhena rūpañca upalabbhati sacchikaṭṭhaparamaṭṭhenāti . āmantā . aññaṃ rūpaṃ añño puggaloti . Na hevaṃ vattabbe. {17.1} Ājānāhi niggahaṃ hañci puggalo upalabbhati sacchikaṭṭhaparamaṭṭhena rūpañca upalabbhati sacchikaṭṭhaparamaṭṭhena tena vata re vattabbe aññaṃ rūpaṃ añño puggaloti yaṃ tattha vadesi vattabbe kho puggalo upalabbhati sacchikaṭṭhaparamaṭṭhena rūpañca upalabbhati sacchikaṭṭhaparamaṭṭhena no ca vattabbe aññaṃ rūpaṃ añño Puggaloti micchā {17.2} no ce pana vattabbe aññaṃ rūpaṃ añño puggaloti no vata re vattabbe puggalo upalabbhati sacchikaṭṭhaparamaṭṭhena rūpañca upalabbhati sacchikaṭṭhaparamaṭṭhenāti yaṃ tattha vadesi vattabbe kho puggalo upalabbhati sacchikaṭṭhaparamaṭṭhena rūpañca upalabbhati sacchikaṭṭhaparamaṭṭhena no ca vattabbe aññaṃ rūpaṃ añño puggaloti micchā .pe.

[18] Puggalo upalabbhati sacchikaṭṭhaparamaṭṭhena vedanā ca upalabbhati sacchikaṭṭhaparamaṭṭhena .pe. saññā ca upalabbhati .pe. saṅkhārā ca upalabbhanti .pe. viññāṇañca upalabbhati sacchikaṭṭhaparamaṭṭhenāti . āmantā . aññaṃ viññāṇaṃ añño puggaloti. Na hevaṃ vattabbe. {18.1} Ājānāhi niggahaṃ hañci puggalo upalabbhati sacchikaṭṭhaparamaṭṭhena viññāṇañca upalabbhati sacchikaṭṭhaparamaṭṭhena tena vata re vattabbe aññaṃ viññāṇaṃ añño puggaloti yaṃ tattha vadesi vattabbe kho puggalo upalabbhati sacchikaṭṭhaparamaṭṭhena viññāṇañca upalabbhati sacchikaṭṭhaparamaṭṭhena no ca vattabbe aññaṃ viññāṇaṃ añño puggaloti micchā {18.2} no ce pana vattabbe aññaṃ viññāṇaṃ añño puggaloti no vata re vattabbe puggalo upalabbhati sacchikaṭṭhaparamaṭṭhena viññāṇañca upalabbhati sacchikaṭṭhaparamaṭṭhenāti yaṃ tattha vadesi vattabbe kho puggalo upalabbhati sacchikaṭṭhaparamaṭṭhena viññāṇañca upalabbhati sacchikaṭṭhaparamaṭṭhena No ca vattabbe aññaṃ viññāṇaṃ añño puggaloti micchā .pe.