[1596] Paccayatā vavatthitāti . āmantā . nanu vīmaṃsā hetu so ca adhipatīti . āmantā . hañci vīmaṃsā hetu so ca adhipati tena vata re vattabbe hetupaccayena paccayo adhipatipaccayena paccayoti.

[1597] Nanu chandādhipati sahajātānaṃ dhammānaṃ adhipatīti. Āmantā. Hañci chandādhipati sahajātānaṃ dhammānaṃ adhipati tena vata re vattabbe adhipatipaccayena paccayo sahajātapaccayena paccayoti.

[1598] Nanu viriyādhipati sahajātānaṃ dhammānaṃ adhipatīti. Āmantā. Hañci viriyādhipati sahajātānaṃ dhammānaṃ adhipati tena vata re vattabbe adhipatipaccayena paccayo sahajātapaccayena paccayoti . nanu viriyādhipati sahajātānaṃ dhammānaṃ adhipati tañca indriyanti . Āmantā . hañci viriyādhipati sahajātānaṃ dhammānaṃ adhipati tañca indriyaṃ tena vata re vattabbe adhipatipaccayena paccayo indriyapaccayena paccayoti.

[1599] Nanu viriyādhipati sahajātānaṃ dhammānaṃ adhipati tañca maggaṅganti . āmantā . hañci viriyādhipati sahajātānaṃ dhammānaṃ adhipati tañca maggaṅgaṃ tena vata re vattabbe adhipatipaccayena paccayo maggapaccayena paccayoti.