[1826] Pañcaṅgiko maggoti. Āmantā. Nanu aṭṭhaṅgiko maggo vutto bhagavatā . seyyathīdaṃ . sammādiṭṭhi .pe. sammāsamādhīti . Āmantā . hañci aṭṭhaṅgiko maggo vutto bhagavatā . seyyathīdaṃ. Sammādiṭṭhi .pe. sammāsamādhi no vata re vattabbe pañcaṅgiko maggoti. Pañcaṅgiko maggoti. Āmantā. Nanu vuttaṃ bhagavatā maggānaṭṭhaṅgiko seṭṭho saccānaṃ caturo padā virāgo seṭṭho dhammānaṃ dipadānañca cakkhumāti attheva suttantoti. Āmantā. Tena hi aṭṭhaṅgiko maggoti.

[1827] Sammāvācā maggaṅgaṃ sā ca na maggoti. Āmantā. Sammādiṭṭhi maggaṅgaṃ sā ca na maggoti . na hevaṃ vattabbe .pe. sammāvācā maggaṅgaṃ sā ca na maggoti . āmantā . Sammāsaṅkappo .pe. sammāvāyāmo .pe. sammāsati .pe. Sammāsamādhi maggaṅgaṃ so ca na maggoti . na hevaṃ vattabbe .pe. sammākammanto .pe. sammāājīvo maggaṅgaṃ so ca na maggoti . āmantā . sammādiṭṭhi .pe. sammāsamādhi maggaṅgaṃ so ca na maggoti. Na hevaṃ vattabbe .pe.

[1828] Sammādiṭṭhi maggaṃ sāca maggoti . āmantā . Sammāvācā maggaṅgaṃ sā ca maggoti . na hevaṃ vattabbe .pe. Sammādiṭṭhi maggaṅgaṃ sā ca maggoti . āmantā . sammākammanto .pe. sammāājīvo maggaṅgaṃ so ca maggoti . na hevaṃ vattabbe .pe. sammāsaṅkappo .pe. sammāvāyāmo .pe. sammāsati .pe. sammāsamādhi maggaṅgaṃ so ca maggoti . āmantā . Sammāvācā .pe. sammākammanto .pe. sammāājīvo maggaṅgaṃ so ca maggoti. Na hevaṃ vattabbe .pe.

[1829] Ariyo aṭṭhaṅgiko maggoti . āmantā . Nanu vuttaṃ bhagavatā pubbeva kho panassa kāyakammaṃ vacīkammaṃ ājīvo suparisuddho hoti evamassāyaṃ ariyo aṭṭhaṅgiko maggo bhāvanāpāripūriṃ gacchatīti attheva suttantoti. Āmantā. Tena hi pañcaṅgiko maggoti.