[388] Anāgataṃ atthīti . āmantā . nanu vuttaṃ bhagavatā kabaḷīkāre ce bhikkhave āhāre natthi rāgo natthi nandi natthi taṇhā appatiṭṭhitaṃ tattha viññāṇaṃ avirūḷhaṃ yattha appatiṭṭhitaṃ viññāṇaṃ avirūḷhaṃ natthi tattha nāmarūpassa avakkanti yattha natthi nāmarūpassa avakkanti natthi tattha saṅkhārānaṃ vuḍḍhi yattha natthi saṅkhārānaṃ vuḍḍhi natthi tattha āyatiṃ punabbhavābhinibbatti yattha natthi āyatiṃ punabbhavābhinibbatti natthi tattha āyatiṃ jātijarāmaraṇaṃ yattha natthi āyatiṃ jātijarāmaraṇaṃ asokantaṃ bhikkhave arajaṃ anupāyāsanti vadāmi phasse ce bhikkhave āhāre ... manosañcetanāya ce bhikkhave āhāre ... viññāṇe ce bhikkhave āhāre natthi rāgo natthi nandi .pe. arajaṃ anupāyāsanti vadāmīti attheva suttantoti. Āmantā. Tena hi na vattabbaṃ anāgataṃ atthīti. Sabbamatthītikathā. -------