[454] Mārakāyikā devatā neva attano na aññesaṃ na tassa asucisukkavisaṭṭhiṃ upasaṃharantīti . āmantā . hañci mārakāyikā devatā neva attano na aññesaṃ na tassa asucisukkavisaṭṭhiṃ upasaṃharanti no vata re vattabbe mārakāyikā devatā arahato asucisukkavisaṭṭhiṃ upasaṃharantīti.

[455] Mārakāyikā devatā arahato asucisukkavisaṭṭhiṃ upasaṃharantīti. Āmantā. Lomakūpehi upasaṃharantīti. Na hevaṃ vattabbe .pe.

[456] Mārakāyikā devatā arahato asucisukkavisaṭṭhiṃ upasaṃharantīti. Āmantā . kiṃkāraṇāti . handa hi vimatiṃ gāhayissāmāti . Atthi arahato vimatīti. Na hevaṃ vattabbe .pe.

[457] Atthi arahato vimatīti . āmantā . atthi arahato satthari vimati dhamme vimati saṅghe vimati sikkhāya vimati pubbante vimati aparante vimati pubbantāparante vimati idappaccayatā- paṭiccasamuppannesu dhammesu vimatīti. Na hevaṃ vattabbe .pe.