[470] Atthi arahato asucisukkavisaṭṭhi na ca arahā methunaṃ dhammaṃ paṭiseveyya methunaṃ dhammaṃ uppādeyya .pe. jātarūparajataṃ sādiyeyyāti . āmantā . atthi puthujjanassa asucisukkavisaṭṭhi na ca puthujjano methunaṃ dhammaṃ paṭiseveyya methunaṃ dhammaṃ Uppādeyya puttasambādhasayanaṃ ajjhāvaseyya kāsikacandanaṃ paccanubhaveyya mālāgandhavilepanaṃ dhāreyya jātarūparajataṃ sādiyeyyāti . Na hevaṃ vattabbe .pe.

[471] Atthi arahato asucisukkavisaṭṭhīti . āmantā . nanu arahato rāgo pahīno ucchinnamūlo tālāvatthukato anabhāvaṃ kato āyatiṃanuppādadhammoti . āmantā . hañci arahato rāgo pahīno ucchinnamūlo tālāvatthukato anabhāvaṃ kato āyatiṃanuppādadhammo no vata re vattabbe atthi arahato asucisukkavisaṭṭhīti.

[472] Atthi arahato asucisukkavisaṭṭhīti . āmantā . nanu arahato doso pahīno .pe. moho pahīno māno pahīno diṭṭhi pahīnā vicikicchā pahīnā thīnaṃ pahīnaṃ uddhaccaṃ pahīnaṃ ahirikaṃ pahīnaṃ .pe. anottappaṃ pahīnaṃ ucchinnamūlaṃ tālāvatthu kataṃ anabhāvaṃ kataṃ āyatiṃanuppādadhammanti . āmantā . hañci arahato anottappaṃ pahīnaṃ ucchinnamūlaṃ tālāvatthukataṃ anabhāvaṃ kataṃ āyatiṃanuppādadhammaṃ no vata re vattabbe atthi arahato asucisukkavisaṭṭhīti.

[473] Atthi arahato asucisukkavisaṭṭhīti . āmantā . nanu arahato rāgappahānāya maggo bhāvitoti . āmantā . hañci arahato rāgappahānāya maggo bhāvito no vata re vattabbe atthi arahato asucisukkavisaṭṭhīti