[486] Paradhammakusalo arahā vītarāgo vītadoso vītamoho .pe. Sacchikātabbaṃ sacchikataṃ natthi tassa asucisukkavisaṭṭhīti . Āmantā . sadhammakusalo arahā vītarāgo vītadoso vītamoho .pe. sacchikātabbaṃ sacchikataṃ natthi tassa asucisukkavisaṭṭhīti . Na hevaṃ vattabbe .pe.

[487] Atthi arahato asucisukkavisaṭṭhīti . āmantā. Nanu vuttaṃ bhagavatā ye te bhikkhave bhikkhū puthujjanā sīlasampannā sati sampajānā niddaṃ okkamanti tesaṃ asuci na muccati yepi te bhikkhave bāhirakā isayo kāmesu vītarāgā tesampi asuci na muccati aṭṭhānametaṃ bhikkhave anavakāso yaṃ arahato asuci mucceyyāti attheva suttantoti. Āmantā. Tena hi na vattabbaṃ atthi arahato asucisukkavisaṭṭhīti.

[488] Na vattabbaṃ atthi arahato parūpahāroti . āmantā. Nanu arahato cīvarapiṇḍapātasenāsanagilānapaccayabhesajjaparikkhāraṃ pare upasaṃhareyyunti . āmantā . hañci arahato cīvarapiṇḍapātasenāsana- gilānapaccayabhesajjaparikkhāraṃ pare upasaṃhareyyuṃ tena vata re vattabbe atthi arahato parūpahāroti .

[489] Arahato cīvarapiṇḍapātasenāsanagilānapaccayabhesajjaparikkhāraṃ pare upasaṃhareyyunti . atthi arahato parūpahāroti . āmantā . Arahato sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā pare upasaṃhareyyunti. Na hevaṃ vattabbe .pe. Parūpahārakathā. ------