[490] Atthi arahato aññāṇanti . āmantā . atthi arahato avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇanti. Na hevaṃ vattabbe .pe.

[491] Natthi arahato avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇanti . Āmantā . hañci natthi arahato avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇaṃ no vata re vattabbe atthi arahato aññāṇanti.

[492] Atthi puthujjanassa aññāṇaṃ atthi tassa avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇanti . āmantā . atthi arahato aññāṇaṃ atthi tassa avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇanti . na hevaṃ vattabbe .pe.

[493] Atthi arahato aññāṇaṃ natthi tassa avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇanti . āmantā . atthi puthujjanassa Aññāṇaṃ natthi tassa avijjā avijjogho avijjāyogo avijjānusayo avijjāpariyuṭṭhānaṃ avijjāsaññojanaṃ avijjānīvaraṇanti. Na hevaṃ vattabbe .pe.