[494] Atthi arahato aññāṇanti . āmantā . arahā aññāṇapakato pāṇaṃ haneyya adinnaṃ ādiyeyya musā bhaṇeyya pisuṇaṃ bhaṇeyya pharusaṃ bhaṇeyya samphaṃ palapeyya sandhiṃ chindeyya nillopaṃ hareyya ekāgārikaṃ kareyya paripanthe tiṭṭheyya paradāraṃ gaccheyya gāmaghātaṃ kareyya nigamaghātaṃ kareyyāti . na hevaṃ vattabbe .pe.

[495] Atthi puthujjanassa aññāṇaṃ puthujjano aññāṇapakato pāṇaṃ haneyya adinnaṃ ādiyeyya .pe. gāmaghātaṃ kareyya nigamaghātaṃ kareyyāti . āmantā . atthi arahato aññāṇaṃ arahā aññāṇapakato pāṇaṃ haneyya adinnaṃ ādiyeyya .pe. Gāmaghātaṃ kareyya nigamaghātaṃ kareyyāti. Na hevaṃ vattabbe .pe.

[496] Atthi arahato aññāṇaṃ na ca arahā aññāṇapakato pāṇaṃ haneyya adinnaṃ ādiyeyya .pe. gāmaghātaṃ kareyya nigamaghātaṃ kareyyāti . āmantā . atthi puthujjanassa aññāṇaṃ na ca puthujjano aññāṇapakato pāṇaṃ haneyya adinnaṃ ādiyeyya .pe. gāmaghātaṃ kareyya nigamaghātaṃ kareyyāti. Na hevaṃ vattabbe .pe.

[497] Atthi arahato aññāṇanti . āmantā . atthi arahato satthari aññāṇaṃ dhamme aññāṇaṃ saṅghe aññāṇaṃ sikkhāya aññāṇaṃ pubbante aññāṇaṃ aparante aññāṇaṃ pubbantāparante aññāṇaṃ idappaccayatāpaṭiccasamuppannesu dhammesu aññāṇanti. Na hevaṃ vattabbe .pe.